今屆 DSE 正如火如荼，同學仔若無地方溫書，灣仔有個新選擇。位於灣仔春園街春暉大廈的餐廳「ULURU」今日公布，由即日開始，逢星期一至五下午 2 時半到 5 時半，免費開放予學生做自修室，「橫掂呢個時段我哋係冇用嘅，唔好嘥咗佢，介紹返，我哋地方好大，只係想陪你一齊考試。」
餐廳在帖文中指，近日市道不景，「下午時段勁安靜，地方又大，大把位」，所以嘗試開放做免費自修室，學生只要出示學生證，不一定要是應屆考生，「所有嘢都免費，因為你你你同我都係留下來的人，盡用啦」，另外還會免費送一杯飲品及一份甜品，「我地都會繼續為大家打氣，一齊努力行將來嘅路。」
餐廳負責人 Ricky 接受訪問時指，平時留意到自修室、Starbucks 坐滿學生「爆晒無位」，最近食肆生意「差得咁緊要」，他們餐廳可以容納到近百人，「但係 tea time 零客咁滯，同事坐晒喺度無嘢做」，不如開放場地予學生溫書， 至於提供免費飲品和甜品，成本亦不高，「咁佢哋都要飲嘢㗎，個 cost 唔係好高，俾啲甜佢哋開心吓，都係一啲心意。」
Ricky 指，餐廳已開業五年，去年十月火災重新裝修，遇上市道不景，「（生存危機）梗係有啦，任何一間餐飲都係咁答你」，經營狀況「今日唔知聽日事」，但反正下午茶時段無客人，不如善用地方，「真係希望坐爆學生，唔使有收入。」
